Nagpanugyan ang Provincial Environment and Natural Resources Officer (PENRO) sang Negros Occidental sa mga pumuluyo nga mangin responsable sa mga basura ilabi na sang mga plastic wastes kadungan sang obserbasyon sang Earth Day.
Sa interview sang Bombo Radyo Bacolod kay Engineer Joan Nathaniel Gerangaya, madamo sang mga activities nga patigayunon kuntani para sa obserbasyon sang Earth Day subong nga adlaw, Abril 22 ang ginkanselar bangud sa mainit nga tiyempo.
Suno kay Gerangaya, bangud sa indi maagwanta nga mataas nga temperatura, nagdesisyon na lamang ang PENRO nga pila sa mga naka line-up nga mga aktibidad nga ginkanselar bangud sa mainit tiyempo amo ang panikang-tikang padulong sa mga watersheds.
Suno diri, nagabalaka man ang mga ini sa mga participants bangud alas 7:00 pa lang ang takna sa aga, tuman na kasakit ang init tubtob na nga mag alas 5:00 ang takna sa hapon.
Suno kay Gerangaya, ang ginpasugtan lamang nila amo ang trekking sang mga katapo sang Intergrated Bar of the Philippines padulong sa Tinagong Dagat.
Suno diri, sa karun ang selebrasyon sang Earth Day ang ginpaagi nalang sa advocacy agud ipalab-ot sa mga pumuluyo ang importansya sang kalibutan nga dapat amligan bangud wala naman kita sang iban nga maestaran sa tion nga ini ang dalayon na nga maguba.
Panawagan sini nga mangin responsable sa pagmanage sang mga basura agud nga indi madasig nga mapuno ang landfills kag magkadto sa water ways nga kaangay sang dagat nga kan-on man sang isda kag magabalik man sa atun.
