Nagpanugyan ang pinuno sang Provincial Environment Management Office (PEMO) nga dapat mas mangin aktibo ang Barangay, Municipal kag City Monitoring Committee natuhoy sa pagbantay sa mga quarry operations sa probinsya sang Negros Occidental.
Suno kay Atty. Danilo Amisola, ginalantaw nga may kaangtanan sa mga quarry operation sa Northern Negros ang mga pagbaha nga nagluntad sa lugar sa pag-umpisa pa lang sang 2021.
Samtang kaupod man sang PEMO nga nagtsekyar sa mga quarry operation ang representate gikan sa Committee on Environment sang Sangguniang Panlalawigan agud matumod kun may kontribusyon ang mga ini sa nagluntad nga mga pagbaha.
Sa karun, ang District 2 pa lang ang nainspeksyon sa bahin sang Northern Negros Occidental kag may nabilin pa nga duha ka distrito nga naka-schedule naman nga sunod nga tsekyaron.
Samtang isa man sa panugyan sa mga local government units (LGUs) nga may yara sang quarry operations nga hugot nga imonitor ang mga aktibidad.
Nahibaluan naman nga nagabutang sang mga Bantay Dalan ang mga LGU nga amo ang nagatsekyar sa mga nagalabay ukon nagagwa nga dalagko nga salakyan nga may dala nga mga quarry materials.
Ginatsekyar naman ang mga ini kun may-ara sang coupon nga nagapamatuod nga sila ang quarry permitee nga may lisensya sa nagakaigo nga mga talatapan sang gobyerno.
