Kadungan sang selebrasyon sang Earth Day subong nga adlaw, nagpahanumdum ang Provincial Environment Officer sang Negros Occidental nga ang gamay nga mga ginahimo para sa kalibutan ang dako na ang epekto agud mapahagan-hagan ang global warming.
Sa interview sang Bombo Radyo kay Maria Elena San Jose, subong nga adlaw ang highlight sang ila mga aktibidad bangud ginasaulog ang Earth Day.
Suno kay San Jose, kada tuig may nagkalain-lain nga aktibidad sila nga ginapatigayon in partnership sa mga local government unit kag academe nga nagadugay sang duha ka semana.
Suno diri, nagsugod ang ila mga aktibidad sang Abril 17 kag magatakop sa Abril 27.
Ini ang ginpamanuan sang Provincial Government sang Negros Occidental in partnership sa mga local government units.
Sang Abril 17 tubtob 19, may ginpatigayon sang wetlands specialization kaupod ang LGU sang Victorias kag academe.
Magluwas diri, nagapatigayon man sila sang monitoring sa mga kasapatan kag mangroove assessment.
Suno diri, ang national, provincial, regional, local government kag academe ang nagabuligay gid agud maconserve ang dunang manggad.
Suno sa iya, indi lamang kun Earth Day dapat dumdumon nga halungan ang kalibutan kundi kada adlaw.
Nagpahanumdum man ini nga ang magagmay nga mga tikang kaangay sang coastal clean up, pagpananum, pagconserve sang enerhiya kag tubig kag mga proyekto sang gobyerno ang dako na ang mabulig.
