Ginpangayuan sang Provincial Government ang Office of the Provincial Agriculturist sang napatpat nga plano kun sa diin ang aktwal nga kadtuan sang P15 million nga ginapangayo sini nga budget para sa proyekto sini para sa El Nino.
Suno kay Provincial Administrator Atty. Rayfrando Diaz, ang P15 million nga budget nga ginapangayo sang OPA para sa prevention program para sa El Nino ang wala nila gin-aprubahan bangod nga naka-generalize ang plano nga ginpasa sang opisina.
Suno diri, iya luyag nga makuha ang napatpat nga plano kun sa diin gamiton nga area ang pondo agud may yara sila sang sukton kun ano na ang ila na-trabaho.
Gani, wala ini naghatag sang pondo kun wala ini sang klaro nga direksyon kun diin ini makadto.
Apang, nagpasiguro ini nga may supesyente nga pondo ang probinsya para diri.
Sa pihak nga bahin, ginkalipay ni Negros Occidental Governor Eugenio Jose ‘Bong’ Lacson ang pag-appoint kay Pablo Luis Azcona bilang bag-o nga acting administrator kag chief executive officer (CEO) sang Sugar Regulatory Administration (SRA).
Suno kay Lacson, isa ka maayo nga butang nga tumandok sang Kabankalan City, Negros Occidental ang bag-o nga acting administrator.
Gani, ginalauman sini nga ang pwesto nga ginhalinan ni Azcona ang igahatag sa isa man ka Negrosanon.
