Nagsugtanay ang probinsya sang Negros Occidental kag ang ciudad sang Bacolod nga mapahanugutan ang mga nagagamit sang provincial passes nga makasulod sa ciudad.
Ini ang ginkumpirmar ni Mayor Evelio “Bing” Leonardia sa exclusive interview sa iya sang Bombo Radyo.
Suno sa alkalde, gin-ayo ni Governor Eugenio Jose “Bong” Lacson ang city government sang Bacolod nga matugutan ang pagsulod sang mga naga-uyat sang ECQ passes kasunod sa ginapatuman nga number coding scheme sang ciudad.
Suno diri, bangud nga wala sang control number ang mga provincial passes, basehan na lang nila ang mga plaka sang salakyan.
Tanan nga plaka nga nagatapos sa odd number kaangay sang 1,3,5,7 kag 9, mahimo ang mga ini makasulod sa Bacolod kada Lunes, Miyerkules kag Biyernes.
Samtang, kada plaka naman nga nagatapos sa even number kaangay sang 0,2,4,6,8 ang pahanugutan lamang kada Martes, Huwebes kag Sabado.
Kag wala naman sang may makasulod sa ciudad kada Domingo.
Samtang, naghingyo naman si anay congressman Albee Benitez nga provincial consultant sa karon, nga ma-review ang pagsulundan sang ciudad ilabi na nga ang mga ginahatagan sang passes sang probinsya ang yara sa essential services.
Suno kay Benitez, indi man basehan ang numero sang salakyan sa pagsaka sang transmission sang balatian.
Dugang pa sini, ang pagbuhin sa mga salakyan nga nagasulod sa Bacolod ang indi makagarantiya nga mabuhinan ang numero sang mga tawo nga nagalibot diri.
