Liwat nga nagapanghanda ang provincial government sang Negros Occidental sa pagpauli sang mga overseas Filipino workers (OFWs) kag mga locally stranded individuals (LSIs) kadungan sa pagtapos sang moratorium subong nga adlaw.
Sa interview sang Bombo Radyo Bacolod kay provincial incident management team (PIMT) head Dr. Zeaphard Gerhart Caelian, ginpahayag sini nga nagapanghanda naman karon ang probinsya sa pagsugod puli sang mga Negrense returning residents bwas, Setyembre 8.
Suno kay Caelian, nagpadala naman sang sulat si Negros Occidental Governor Eugenio Jose “Bong” Lacson sa national government agud mag-apelar nga kuntani sa mga probinsya ukon kada local government unit (LGU) nalang magpatigayon sang screening, testing kag 14-day quarantine ang mga OFWs kag mga LSIs bangud mas kampante ang komunidad nga paggwa sang mga ini sa quarantine centers, hilway na sila sa virus.
Nahibaluan nga madamo sang mga insidente nga kun naghalin sa Metro Manila ang mga returning residents, negatibo ang mga ini sa COVID-19, apang pag-abot sa probinsya, nagpositibo na ini.
