Ginpasalamatan ni COMELEC Commissioner Rowena Guanzon ang probinsya sa paghatag sang tribute sa iya iloy nga si anay 2nd District Board Member Atty. Elvira Villena Guanzon antes ini gindala sa ciudad sang Cadiz para sa misa kag seremonya nga patigayunon subong nga adlaw.
Madumduman nga nagtaliwan si Elvira Guanzon sa edad nga 95 sang Hulyo 11 sang aga.
Siya ang nagserbe bilang board member kag representative halin 1962 tubtob 1968 kag ang labing una nga babayi nga nangin katapo sang Provincial Board.
Si Guanzon ang iloy nanday Board Member Pal Guanzon nga nagpalab-ot sang pagpasalamat sa SP sa pag-aprubar sang resolusyon, kag Comelec Commissioner Rowena Guanzon.
Ang anay board member ang nagtaliwan bangud sa komplikasyon tuga sang Parkinson’s disease sa The Doctor’s Hospital, Bacolod City.
Kahapon, ginhatagan ini sang tribute sang provincial government kag ginbasa ang resolusyon sang Sangguniang Panlalawigan tuhoy sa paghatag sang condolences sa pamilya sang anay board member.
Sa speech ni Commissioner Guanzon, nagpasalamat ini kay Governor Eugenio Jose “Bong” Lacson subong man sa mga opisyales sang probinsya kag ginhanduraw ang mga accomplishments sang iya nga iloy.
Suno sa iya, sa 35 ka tuig nga pagserbi ni Atty. Guanzon, madamo ini sang nabuligan nga pamilya kag mga persona.
Gindugang man sini nga maisog kag maalwan ang iya iloy kag wala sang iban pa nga babaye sa Western Visayas ang nakalab-ot sang iya mga binuhatan.
