Nakahanda ang provincial government sang Negros Occidental nga magbulig sa mga pamilya nga may himata nga yara sa karon sa Israel kag naipit sa gyera sa tunga sang Israeli forces kag Hamas militants sa Palestine.
Suno kay Negros Occidental Governor Eugenio Jose ‘Bong’ Lacson, may yara sang Migrants Center sa tupad sang Social Hall sa second floor sang Capitol gani sarang gid makapalapit sa nasambit nga opisina.
Suno kay Lacson, ang nasambit nga opisina ang magabulig sa mga pamilya nga makapakig-angot sa Overseas Workers Welfare Administration kag Department of Migrant Workers.
Suno kay Lacson, mabakod man ang OFWs organization sa Negros Occidental.
Sarang man madala sa ila ang pamilya sang taga-Cadiz nga si Lorie Alcare nga gin-abduct sang Hamas militants sa nasakupan sang Palestine sang Sabado.
Sa karon, wala pa si Lacson sang uyat nga record sang numero sang mga Negrense nga yara sa karon sa Israel kag apektado sang gyera.
Nagpanawagan man si Lacson nga mga yara sa karon sa Israel nga hingalitan ang kahigayunan kun may yara gid man agud nga makapauli sang hilway diri sa Pilipinas.
