Plano sang provincial government sang Negros Occidental nga magbakal sang dugang pa gid nga 20 mil ka mga test kits para sa Molecular Laboratory sa Teresita Lopez Jalandoni Provincial Hospital sa ciudad sang Silay.
Nahibaluan nga may yara na sang 12 mil ka mga test kits nga nauna na bakal sang probinsya kag amo ang ginagamit karon sa amo nga testing center.
Suno kay Negros Occidental Governor Eugenio Jose “Bong” Lacson, may yara pa man sang nabilin nga test kits kag ginabanta nga malab-utan pa ini tubtob sa katapusan sang bulan sang Hunyo.
Sa karon suno kay Lacson nagapangita na sila sang mga accredited nga mga suppliers agud nga baklan.
Suno diri, handa gid ang provincial government nga magbakal sang dugang nga test kits. Samtang, liwat naman sini nga ginpaathag nga ang mga locally stranded individuals ukon mga repatriated overseas Filipino workers nagikan sa Cebu ang kinahanglan gid nga iquarantine sa isolation facility sa ciudad sang Cadiz kag ipaidalom sa swab test.
Nakadepende naman sa availability sang rooms sa Cadiz kun pila ang ila batunon kada adlaw.
Dugang pa ni Lacson, sa Escalante port gid lamang ang mga ini pwede maka-agi.
Suno pa diri nga kinahanglan gid niya ang kooperasyon sang Philippine Ports Authority, Philippine Coast Guard kag sang Maritime Industry Authority agud nga ma-manage sang husto kag magpadayon ang pagpinuli sang mga repatriated OFWs kag mga LSIs nagikan sa Cebu.
Nahibaluan nga ang Cebu ang ginakabig sa gihapon bilang isa ka high risk area.
