Wala pa nakabaton sang kumpirmasyon ang provincial government sang Negros Occidental may kaangtanan sa kaso sang African Swine Fever sa probinsya.
Apang nakabaton sang report ang gobernador nga nagikan sa apat ka mga baboy nga ginkuhaan sang sample sa banwa sang Pulupandan, isa diri ang nagpositibo sa African Swine Fever.
Suno kay Governor Eugenio Jose ‘Bong’ Lacson, nagahimo na sang tikang ang provincial government bisan wala pa sang kumpirmasyon nga may positibo sa ASF sa Negros Occidental.
Suno diri, ginasunod sang probinsya ang protocol sang Bureau of Animal Industry kun sa diin gina-isolate ang lugar nga may ASF positive nga baboy sa sulod sang 500-meter radius.
Sa sulod sang 15 ka adlaw, obserbahan ang lugar kag kun wala sang may napatay liwat, ini ang isolated, apang kun may dugang nga napatay, pagasundon ang BAI protocol nga pagsirado sini sa sulod sang pito ka kilometros kag tubtub sa 10 ka kilometros.
Suno kay Lacson, ginahimo sang provincial government ang mga mga protocol agud nga maaddress ang worse case scenario.
Suno sa gobernador, indi dapat magpadali kundi maghalong sa deklarasyon nga infected sang ASF ang probinsya sang Negros Occidental bangud sa epekto sini sa mga hog raisers.
Suno diri, wala nagapabaya ang provincial government kundi nagahimo sang mga tikang agud nga mapunggan ang paglapta sini.
