Nagapabilin ang hugot nga pagmonitor sang Provincial Health Office sang Negros Occidental sa kaso sang meningococcemia sa probinsya.
Ini apisar pa nga wala sang kompirmasyon ang nareport nga suspected meningococcemia case sa banwa sang Pulupandan.
Sa interview sang Bombo Radyo Bacolod kay Provincial Health Officer Dr. Ernell Tumimbang, wala nakuhaan sang specimen ang anom ka bulan nga lapsag nga napatay sa Pulupandan gani indi makompirmar kun meningococcemia ang gintunaan sang iya nga kamatayon.
Sa pihak sini, ginakonsiderar gihapon suno kay Tumimbang nga meningococcemia case ang narekord sa Pulupandan.
Suno sa provincial health officer, wala sang dapat kahangaw-an ang mga taga Pulupandan bangud may mga gin-implementar nga procedure ang PHO agud indi maglapta ang balatian.
