Nagdihon ang Provincial Price Coordinating Council sang Negros Occidental sang resolusyon nga magapatuman sang price control sa dugang nga mga basic comodities.
Sa interview sang Bombo Radyo kay Provincial Administrator Atty. Rayfrando Diaz, nagdihon ang PPCC, nga ginapamunuan ni Governor Eugenio Jose “Bong” Lacson, sang nasambit nga resolusyon bangud nagasaka ang presyo sang iban nga produkto nga kinahanglan imonitor.
Sang Lunes, ginconvene sang gobernador ang council agud magpasar sang resolution nga nagarekomendar kay Presidente Rodrigo Duterte sa pag-impose sang price ceiling indi lamang sa mga basic necessities kaangay sang mga potable water, poultry kag livestocks kundi subong man sa mga GI sheets, construction materials, solar panels kag generator sets agud masiguro nga adequate, affordable kag accessible sa mga Negrense ang nasambit nga produkto samtang napaidalum ang probinsya sa state of calamity.
Suno kay Diaz, sa idalum sa resolusyon, tubtob lamang sa 10 porsyento ang mangin maximum increase sa presyo sang mga produkto.
Ila naman ginakonsiderar ang pagpatuman sini sa presyo sang mga karne sang baboy kag manok bangud apisar nga wala sang bagyo, nagapasaka sila sang presyo bangud holiday season.
Ginalauman nga mapermahan sang gobernador ang resolusyon sa madali nga tion agud ini ang mapadala sa Malacañang kag mapatuman sa probinsya.
