Tatlo ka mga local government units sa Negros Occidental ang nagdeklarar sang suspension sang klase kag half day sa opisina sang gobyerno subong nga adlaw, Mayo 26, bilang preparasyon sa pagsulod ni Bagyo Betty nga may international name nag Typhoon Mawar sa pungsod.
Kaina, nagpagwa sang executive order ang mga alkalde sang Cauayan, Hinobaan kag Hinigaran nga nagasuspendi sang klase sa tanan nga levels, private kag public schools kag suspension sang trabaho sumugod alas 12:00 kaina sang udto sa mga opisina sang gobyerno sa ila tagsa ka mga LGU.
Suno kay Governor Eugenio Jose “Bong” Lacson, naalerto na sang probinsya ang mga Disaster Risk Reduction and Management Offices sa pagsulod sang bagyo.
Suno diri, may yara na sang plano kag preparasyon ang mga ini in kaso nga magbaskog ang ulan kag magtuga sang pagbaha.
Preparado naman ang Provincial Social Welfare and Development Office sa paghatag sang mga foodpacks and non-food items in kaso nga kinahanglanon.
Suno kay PSWDO officer-in-charge Gerla Sario, as of May 24, may 73,060 ka mga family foodpacks nga available sa Department of Social Welfare and Development 6 nga nagabalor P46.5 million.
May mga nakastandby man nga non-food items kaangay sang hygiene kits, sleeping kits, family kits, kitchen kits kag tents nga nagabalor P42.5 million kag handa nga dal-on sa evacuation center in kaso.
Suno diri, magluwas sa preparasyon para sa bagyo, may mga requests man nagikan sa mga armed conflict areas.
