Ginpahayag sang Provincial Sports Coordinator sang Negros Occidental nga paga-imbistigaran sang screening committee sang DepEd Division of Negros Occidental ang isyu tuhoy sa pagpeke sang dokumento sang isa ka softball player agud nga ini makahampang sa ginsayluhan nga bulutuhuan.
Sa interview sang Bombo Radyo kay Romeo Sison, una nga naka-enroll ang estudyante sa Bacolod City National High School apang nagsaylo ang estudyante nga si Jayce Nadine Pajutal sa Ramon Torres National High School sa siyudad sang Bago.
Wala nakuha sang iloy ang Learner Information System (LIS) sang bata sini gikan sa NOHS kag ini na lamang nag-diretso sa Ramon Torres National High School.
Ginbaton man sang buluthuan ang bata kag ang mga dokumento sini.
Ini ginkwestyon sang NOHS bangud nga wala man nakuha sang bata ang iya Learner Information System, apang ini makahampang nga may kumpleto nga dokumento.
Suno kay Sison, antes nga makasulod sa area meet kinahanglan maglabay sang player sa lower meet.
Pahayag ni Sison, wala sang problema kun mag-transfer ang bata sang buluthuan, apang dapat lamang nga may kumpleto kag matuod ini nga dokumento.
Suno diri, kun may bayolasyon kag sala sa dokumento, indi mahimo nga makapartisipar ang player para sa Provincial Meet.
