Nagpasalig ang provincial veterinarian sa probinsya sang Negros Occidental nga indi kulang ang supply sang karne sang manok sa probinsya, santo sa ila monitoring.
Sa interview sang Bombo Radyo Bacolod kay Dr. Placida Lemana, santo sa monitoring sang provincial veterinary office (PVO) wala sang kakulangan sang supply apang ang presyo kada kilo sa karne sang manok ang nagsaka bangud man sa production cost.
Suno kay Lemana, ang production ang nagsaka gani nagsaka man ang presyo sang karne sang manok.
Kada kilo ang mahimo mabakal sa P250 kada kilo ang pinakamataas sa syudad sang Victorias samtang ang pinakabarato P170 kada kilo ang mabakal sa banwa sang Moises Padilla.
Suno diri, wala sang dapat kabalak-an ang mga pumuluyo sa probinsya sang Negros Occidental bangud self-sufficient ang probinsya pag-abot sa supply sang manok.
Suno sa provincial veterinarian ang probinsya ang nagaproduce sang 1.6 million nga karne sang manok kada bulan samtang sa kada adlaw nagadangat sa 75,000.
Suno kay Lemana, ang konsumo sang karne sang manok ang nagadangat lamang sa 65-70,000 kada adlaw gani ang sobra ang ginapadala sa isla sang panay kag rehiyon 7.
Ang nasambit nga produced chicken meat ang nagikan lamang sa lima ka accredited dressing plant kag wala madala ang sa slaughter houses kag ginaihaw sa mga kabarangayan sa probinsya sang Negros Occidental.
Gin-athag man sini nga wala sang makasulod nga chicken meat sa probinsya nga apektado sang birds flu agud nga maproteksyunan ang 8 million livestock industry sang probinsya sang Negros Occidental.
