Ginpahayag sang team leader sang Fly Control Program sang Negros Occidental Provincial Veterinary Office nga assigned sa area sang Barangay Alianza, Bago City nga mahimo gikan sa backyard hog raisers ukon backyard poultry raisers ang pagduging sang langaw bangod ang ginareklamo nga poultry farm ang nakaligad pa nagsirado.
Madumduman nga gindangop sa Bombo Radyo Bacolod sang isa ka concern citizen gikan sa Barangay Ayungon, La Carlota kun sa diin suba lang ang distansya sa Barangay Alianza ang pagduging sang mga langaw nga gina-alegar sini gikan sa poultry farm ni Lindo Makasa.
Dugang pa sang tagreklamo nga tuman na ang perwisyo sini bangod siya mismo ang makapila na ka beses nga nakakaon sang langaw bangod ang mga ini ang nagahulon sa mga pagkaon bisan sa mga ilimnon gani nagakahangawa ini sa mangin epekto sa ikaayong lawas sang kabataan.
Matapos nga ginpadangat sang Bombo Radyo Bacolod ang concern sa Provincial Veterinary Office, gilayon naman nga ginpakadtuan ang lugar.
Suno kay Dra. Shinly Gemoya, positibo nga may Makasa nga nagapanag-iya sang tatlo ka ektarya nga poultry farm sa Barangay Alianza.
Panindugan sini nga antes paman magharvest sang mga manok ang poultry farm, may mandato na sa mga ini nga ireport sa Provincial Veterinary Office ang petsa sang pagharvest kasubong man ang liwat nga pagload sang mga piso.
Sa pagpadulong sa lugar, nahibaluan nga ila naman ini na-inspect sang Mayo 16 kag wala man sang fly infestation nga nakit-an.
Sa karun wala na nagload sang panibag-o nga manok ang poultry farm bangod sila ang temporaryo nga ginpasarado sang Department of Environment and Natural Resources (DENR) bangod sa pila ka nga violations.
Pahayag ni Dra. Gemoya nga magluwas sa poultry farm, madamo man sang mga backyard hog kag poultry raisers sa nasambit nga barangay.
Gani ginalantaw sini nga indi bangod sa poultry farm ni Makasa kundi bangod sa backyard hog and poultry raisers.
