Ginpasalig sang Provincial Veterinary Office nga wala sang problema sa supply sang dressed chicken kag itlog sang manok sa probinsya sang Negros Occidental bisan padayon sa karon ang pag-alburuto sang Bulkan Taal nga nagaapekto sa mga lugar sa Luzon nga nagaproduce sang itlog kag manok.
Nahibaluan nga ang Calabarzon region sa south of Manila, amo ang ikaduha nga pinakadako nga producer sang pareho nga live chickens kag hogs.
Sa interview sang Bombo Radyo Bacolod kay Provincial Veterinarian Dr. Renante Decena, ginpahayag sini nga wala sang kakulangan sa supply sang dressed chicken bangud madamu ang mga negosyante nga nagasupply diri kag sa pagkamatuod, nagapadala pa ini sa probinsya sang Panay sang supply sang manok.
Wala naman naapektuhan ang supply sang itlog apisar nga apektado ang pagsupply sang Batangas sang itlog bangud sa paglupok sang Bulkan Taal.
Suno diri, wala man nagakuha sang supply sang itlog ang probinsya sa Batangas kundi sa Bantayan Islands.
Kadungan sini, wala man suno kay Decena sang pagsaka sa presyo sang itlog sa merkado.
