Ginpasalig sang provincial veterinarian sang Negros Occidental nga may yara sang bastante nga suplay sang ham ang probinsya para sa Christmas holidays.
Suno kay Dr. Renante Decena, wala sang problema sa suplay sang hamon apisar nga ginadumilian ang pagpasulod sang mga pork products sa Negros bangud may yara sang duha ka mga local manufacturers sa probinsya.
Nahibaluan nga ginadumili ang importasyon sang pork products nagikan sa Luzon kag Mindanao humalin sang nagligad nga tuig bangud sa African Swine Fever.
Naobserbahan naman ni Decena sa ila nga market price monitoring nga medyo mahinay ang baklanay sang local meat products bangud nga nagnubo man ang kapasidad sang mga tawo nga magbakal bangud sa paghuyang man sang money ciculation tuga sang pandemic.
Una diri, nag-abiso na si Decena sa mga pumuluyo nga indi magkabalaka bangud bastante ang suplay sang karne sang baboy kag manok sa palaabuton nga Disyembre.
Ginpahayag sini nga naga-average sa P200 ang presyo sang karne sang baboy sa bilog nga probinsya samtang yara naman sa P220 ang presyo sini sa ciudad sang Bacolod.
Yara naman sa P150 tubtob P155 ang presyo sang kada kilo sang dressed chicken suno kay Decena.
