Ginpahayag sang chief executive officer sang Metro Bacolod Chamber of Commerce and Industry (MBCCI) nga ang dako nga problema amo ang kakulang sang supply sang kuryente kasunod sa pagkadula sang power supply sa isla sang Panay humalin Enero 2 tubtob Enero 5.
Sa interview sang Bombo Radyo kay Frank Carbon, nagkwestyon ini kun diin na ang mga proyekto sang Department of Energy nga tubtob sa karun wala man sang nadugang nga planta sa Visayas.
Kasubong man nga ginkwestyon sini ang National Grid Corporation of the Philippines nga kun ngaa wala sa gihapon naupgrade ang transmission line sang Cebu, Negros kag Panay.
Ini ang mga palamangkotanon ni Carbon bangod nga nakita sini nga ang pamaagi nga ginahimo amo ang rotational brownout kun sa diin maeksperyensyahan ang pagkadula sang kuryente sa iban nga area bangod nga ginabuhinan ang demand kag ang insakto lang nga supply sang kuryente ang ginahatag.
Pahayag ni Carbon, bilang isa ka negosyante, bangod sa problema sa supply sang kuryente, mabudlay mag-ingganyo sa mga foreign investors.
Nagapanawagan ini sa karun nga kun tani kun mag-increase ang supply, ma-increase man ang transmission capacity.
Samtang, nagatrabaho ini sa karun nga makapatigayon sang pagtipon-tipon kaupod ang Energy Regulatory Commission (ERC), National Grid Corporation of the Philippines (NGCP), Department of Energy (DOE) kag MORE Electric and Power Corporation, agud masturyahan ang mga plano kag pagpatukod sang embedded power plants sa isla sang Negros nga posible man mareciprocate sa Panay.
