Nagpanugyan ang Philippine Statistics Authority sa mga holder sang national ID nga may yara sang clerical error nga maghulat-hulat lang bangud igaschedule sang PSA ang pagtadlong sa mga errors.
Tinalikdan nga adlaw, ginpahayag ni National Statistician Dennis Mapa nga akomodaron sang PSA ang pagcorrect sa mga sala nga spelling sang pangalan sang holder ukon indi manami nga photo sa national ID sa last quarter sang 2022.
Sa interview sang Bombo Radyo kay Luis Gonzales, chief statistical specialist sang PSA Negros Occidental, ang personal information sang mga nagparehistro ang ila ginbase sa personal documents ukon valid ID nga ginpresentar sa tion sang registration gani indi matumod kun paano nagsala ang spelling sang pangalan ukon iban nga details.
Tatlo man ka beses ginkuhaan sang photo ang bearer kag ini ang ginpapili sang luyag niya nga ibutang sa ID gani makatingalahan nga indi kuntento ang iban sa ila itsura kag luyag nga magpailis.
Halin sang nagsugod ang distribution sang ID, may pipila na ka ID holders nga nagpadulong sa PSA agud nagreklamo angot sa clerical error.
Suno kay Gonzales, ginaprayoridad pa sa karon ang registration sang mga wala pa nakaparehistro kag ang distribution sang ID bangud dako ang backlog sa printing sa Bangko Sentral ng Pilipinas kag releasing sang ID.
Sa mga ID holders nga may clerical error ang data suno kay Gonzales, sarang gid sila makasubmit sang complaint sa PSA apang magahulat hulat lang kun ano ang advice nagikan sa central office kun san-o ini igaproseso.
Sa mga holders naman nga wala sang problema ang personal information, nagpanugyan si Gonzales nga indi ini paggamiton nga attachment sa authorization letter bangud wala sang pirma nga kitaon sa physical ID.
