BACOLOD CITY — Ginkakas na sa puwesto si Police Senior Insp. Lawrence Gerald Bathan bilang hepe sang kapulisan sa banwa sang Hinigaran.
Ginkumpirmar sa Bombo Radyo ni Police Senior Supt. Rodolfo Castil, director sang Negros Occidental Police Provincial Office, nga nagpaguwa ini sang mandu sa pagkakas kay Bathan sa puwesto kag temporaryo ini nga idestino sa NOCPPO samtang ginahulat ang mandu sa pagpadulong sini sa Malakanyang.
Suno kay Castil, sang nagligad nga bulan pa ginakuha sang Office of the Presidential Adviser on the Peace Process (OPAPP) si Bathan agud I-detail kay Sec. Jesus Dureza apang samtang wala pa sang pormal nga mandu, magatrabaho anay ini sa drug enforcement unit sang NOCPPO agud iya mapadayon ang kampanya kontra sa ilegal nga druga.
Magabulos kay Bathan bilang hepe sang Hinigaran PNP si Police Chief Insp. Jake Barila nga gikan sa Police Regional Office 18, nga personal nga ginpili ni Hinigaran Mayor Jose Naddie Arceo.
Apang ginklaro sang NOCPPO Director nga wala niya gin-relieve si Senior Insp. Bathan bangud sa tension sa tunga nila ni Mayor Arceo kundi bangud ginmandu ini ni PRO-18 Director Chief Supt. Edmund Gonzales.
Nagapati naman si Castil nga ang mandu ni Gonzales ang kasunod sang pag-request ni Mayor Arceo kay PNP Chief Director General Ronald dela Rosa nga ilisan si Bathan.
