Nagalaom ang provincial Public Affairs Office nga madamo pa ang magapadulong sa ila opisina agud magpangayo sang bulig kasunod sang pagtukod sang probinsiya sang OFW help desk.
Sa interview sang Bombo Radyo Bacolod kay community officer III April Joy Duran, iya ginpahayag nga may yara na sang apat ka mga persona nga nagpadulong sa ila talatapan agud magpangayo sang bulig humalin sang nagbukas ini sang Lunes.
Suno sa iya, kalabanan sa mga nagpangayo sang bulig ang may yara sang himata sa Middle East, Kuwait kag Jeddah nga luyag na magpauli sa pungsod bangud gina-maltrato sila sang ila amo.
Nagpasalig si Duran nga himuon gid sang probinsiya ang masarangan sini agud mabuligan ang mga Negrense overseas Filipino workers nga nagakinahanglan sang bulig.
Nagpangabay man ini sa mga may yara sang pamilya sa luwas sang pungsod nga luyag mahibaluan ang ila kahimtangan ukon indi nila makontak, mahimo nga magdangop sa OFW help desk agud mabuligan.
Dugang pa ni Duran, pwede man makatawag ang mga ini sa ila nga himata nga OFW bangud may yara sila free call sa OFW help desk basta may mga contact numbers lamang ang mga ini.
