Ginpangunahan ni Senator Risa Hontiveros ang public consultation para sa “Anti-Political Dynasty Bill” sa Carlos Hilado Memorial State University (CHMSU) – Alijis Campus.
Kalakip man sa siyam ka panelist si Bacolod City Mayor Greg Gasataya kag political analyst Atty Jomax Ortiz.
Sa ambush interview kay Senator Risa Hontiveros, ginpahayag sini nga ini ang ikatatlo na nga public consultation.
Ang una ang ila ginpatigayon sa Pasig City, ginsundan sa Calamba, Laguna, ikatatlo ang Bacolod City, samtang tuyo man sini nga magpatigayon sang public consultation sa Central Luzon kag Mindanao.
Ang public consultation ang gintambungan sang pila ka sektor, kalakip na ang mga estudyante, mangunguma, mangingisda kag iban pa.
Suno kay Hontiveros, ang consensus sang publiko ang ila nga gamiton sa pagpabakod sa mga pending bills sa Senado kag Kamara.
Nahibaluan nga may apat na ka pending Anti-Political Dynasty Bill sa Senado nga ginalakipan sang Senate Bill No. 18 nga gin-author ni Senator Robin Padilla, Senate Bill No. 35 nanday Senator Ping Lacson kag Senator Erwin Tulfo, Senate Bill No. 285 ni Senator Kiko Pangilinan kag Senate Bill No. 1528 ni Senator Risa Hontiveros.
Samtang may 22 naman ka pending Anti-Political Dynasty Bill sa House of Representatives.
Suno kay Hontiveros, ginatinguhaan sini nga matapos na ang public consultations sa Marso.
Nagalaom ang Senadora nga makahuman sang Anti-Political Dynasty Law ilabi na nga ini ang suportado sang one-fourth sang Senate, prayority legislation sang Legislative Executive Development Advisory Council (LEDAC) kasubong man sang Office of the President.
