Sa duha ka semana nga pagpungko sa Public Employment Service Office (PESO), may nakita naman nga mga pending recruitment sa mga Barangay ang panibag-o nga PESO manager nga ila man nga ginpadayun.
Suno kay Jovelyn Canoy Dato-on, amat-amat naman nila nga nagakaplastar ang recruitment process sa mga kabarangayan.
Dako naman nga dungog para sa iya nga sila ang nagapanaog sa Barangay, agud nga makita sang mga pumuluyo nga may-ara sila sang masandigan nga gobyerno.
Nakapanaog na ang mga ini sa Barangay Villamonte, Barangay 20 kag Barangay Mandalagan.
Pasalig sang PESO manager nga may maayo nga plano si Mayor Benitez kun sa diin sila ang nagapartner sa mga dalagko nga pribado nga kumpanya.
Ini ang pamaagi man sang Benitez Administration agud mapabaskog ang Public-Private Partnership sa Bacolod.
Kalabanan sa mga employment vacancies ang sa bahin sang customer service.
Humalin sang Mayo 31 tubtob sa karun, nagdangay na sa masobra 6,000 ang applications.
Santo sa matrix, yara sa 60 tubtob 70 porsyento ang mga unemployed nga sarang nila nga madeploy gikan sa mga aplikante.
May iban naman nga nag-apply nga yara na sa retiring age, nga ginalantaw man nila nga mahatagan sang tyansa.
Kun indi man mahatag sa mga ini ang trabaho, ginalantaw nu Dato-on nga mahimo sila makahatag sang offer sa mga kabataan sang mga ini.
Madamo naman sang mga IT graduates kag iban pa nga computer related courses nga naga-apply nga nakita sini nga ginakinahanglan gid sang mga kompanya, kasubong man ang mga number-related cources kaangay sa engineering kag accounting.
Ginapakamaayo naman ni Dato-on nga nabatyagan sini nga mas nangin bukas ang karun nga administrasyon bangod derekta ang pag-address sang mga problema kag mahimo man nga makapalapit ang mga pumuluyo derekta sa iya ukon kay Mayor Benitez bangod bukas man ini sa diskusyon.
Sa karun, madamo na sang mga private companies nga nagpadala sang invitation nga luyag makigpartner sa Bacolod City Government.
