Padayunon ang nakaschedule nga public hearing angot sa request sang Victorias City Government sa paghaboy sang residual waste sa Bacolod Sanitary Landfill, apisar nga ang request ang ginbawi na ni Victorias City Mayor JunB Bantug.
Madumduman nga ginwithdraw na sang alkalde sang Victorias City ang ginsumiter nga Memorandum of Agreement sa Bacolod City Council, sa panindugan nga nabatian sini ang reklamo sang mga pumuluyo sa Brgy Felisa.
Sa interview sang Bombo Radyo Bacolod kay Bacolod City Councilor Al Victor Espino, chairperson sa Committee on Laws and Ordinances kag Good Governance, apisar sa withdrawal dayunon niya ang public hearing sa session hall sang Sangguniang Panlungsod sa Martes, Hulyo 14 alas-11:00 sang aga.
Wala naman sini ginbawi ang nangin pahayag nga ‘uneducated’ ang pila sa mga nagakomintar sa social media batok sa proposal.
Panindugan ni Espino nga ginatawag niya ang mga ini nga ‘uneducated’ bangod sila ang wala nakahangop ukon wala nakahibalo sang kamatuoran.
Panindugan sini nga wala paman sang ginahimo ang Sangguniang Panlungsod, sila ang kaangay nga ginhusgaran na.
Gani suno diri, nagakadapat lamang nga mapungkuan kag madiskusyonan ang isyu para maathagan ang mga nagapamatok kag mapamatian man ang ila panindugan.
