Nagpatigayon sang public hearing ang Committee on Energy and Public Utilities nga ginpanguhan ni Councilor Roberto “Bobby” Rojas agud nga diskusyunan ang mga issue sa Baciwa PrimeWater kahapon.
Sa interview sang Bombo Radyo Bacolod kay Water Watch Negros Convenor Wennie Sancho, nangin mainit ang diskusyon kag sa masami ginpakita sang BACIWA/PrimeWater ang mga charts kag ginpahayag ni Sancho nga baliskad ang nagakatabo sa komunidad sangsa ginapresentar sang water concessionaire.
Suno kay Sancho, ginpunto sini sa public hearing nga dapat nga maghimo sang tikang ang BACIWA/Primewater agud nga makay-o ang ila ginahatag nga serbisyo sa mga pumuluyo.
Suno diri, ang tanan nila nga reklamo ang ginconsolidate agud nga mahimuan sang committee report.
Ang tanan nga reklamo ang napalab-ot naman sa water concessionaire kag isa na diri ang mahigko nga tubig nga nagagwa sa mga gripo sang mga kunsomidor.
May nagrason pa nga ini ang bangud sa chemical apang ginsabat ni Sancho nga wala sang bisan ano pa nga technical nga ekplinasyon nga makapaumpaw sa agoniya sang mga kunsumidor sa ila ginahatag nga serbisyo.
Sa karun ginahulat sang mga ini ang committee report nagikan sa Sangguniang Panlungsod agud nga makapangayo sang kopya kag malantaw ang kaundan sini.
Dugang pa nga ginahulat sang ang mga ini ang legislative inquiry bangud maggwa gid ang tanan nga mga reklamo sang mga konsumidor batok sa serbisyo nga ginahatag sang BACIWA/PRIMEWATER.
