Nagpatawag sang public hearing ang ciudad sang Bacolod sa pagpanguna sang chairperson sang Committee on Energy and Public Utilities may kaangtanan sa pagreview sang kontrata sang Bacolod City Water District (BACIWA) kag Prime Water Inc.
Ang public hearing ang ginpatigayon sa Bacolod City Government Center kag sa pagpanguna ni Councilor Claudio Jesus “Kalaw” Puentevella, kag nagtambong man ang mga board of directors sang BACIWA, representative sang Prime Water kag mga water convenors.
Gintalakay sa programa ang kontrata sa tunga sang BACIWA kag Prime Water kun sa diin nakita kag mabatyagan gid ang kapaltahan sa bahin sang pribado nga kompanya, nga nagapaantos sa madamo nga Bacolodnon.
Magluwas sa indi supisyente nga supply, isa man sa ginbatikos ang mahigko nga tubig.
Napagkit sa kontrata nga ang Prime Water ang dapat maghatag sang matinlo kag potable water.
Santo sa March 15 data nga ginpagwa sang BACIWA-Prime Water, nakita nga 18.79 percent lamang sa bilog nga service area ang nagabatun sang 17 tubtob 23 oras nga supply sang tubig.
5.71 percent naman ang maka-enjoy sang 11 tubtob 16 oras nga tubig, 21.24 percent ang lima tubtob napulo ka oras lang may tubig samtang 10.55 percent ang naga-antos sa zero tubtob apat ka oras lamang nga supply sang tubig.
May ginpresentar naman nga mga lihok sa kun paano madugangan ang supply agud masabat ang problema.
