Ginkumpirmar sang public information officer (PIO) sang Department of Education Division of Negros Occidental nga magatakop ang first quarter sang School Year 2020-2021 sa Disyembre 12.
Sa interview sang Bombo Radyo Bacolod kay Ian Arnold Arnaez, ginpahayag sini nga sa Disyembre 12 ang ulihi nga adlaw sang 1st quarter apang ang mga manunudlo ang may yara pa sang isa ka semana nga service training humalin Disyembre 14 tubtob Disyembre 18 para sa ila nga professional growth.
Bangud diri suno kay Arnaez, sa Disyembre 19 gid magasugod ang official Christmas break para sa mga manunudlo.
Maga-resume naman ang second quarter sa Enero 4, 2021.
Liwat nga nagpahanumdom si Arnaez sa mga ginikanan nga wala sang Christmas Party nga matabo subong nga tuig bangud sa COVID-19 pandemic.
Gani, nagpanugyan ini nga imonitor gid ang ila mga kabataan bangud posible nga may yara sang plano ang iban nga magtipon-tipon ukon magpatigayon sang Christmas party.
