Matapos matagtagan sang family food packs ang mga miyembro sang transport sector sa numbered barangays sa ciudad sang Bacolod kahapon, ang dalagko naman nga mga barangay ang nagbaton sang ayuda sugod subong nga adlaw.
Sa interview sang Bombo Radyo Bacolod kay Department of Social Services and Development (DSSD) head Pacita Tero, nahatagan na sang ayuda ang 41 ka mga numbered barangays kahapon kag subong naman nga adlaw hatagan ang named barangays sa syudad.
Suno kay Tero, salakyan sang barangay ang nagakuha sang food packs sa bodega sang DSSD kag barangay na ang responsable sa pagpanagtag sang food packs.
Suno diri, ginhatagan sang prayoridad ang mga transport group kag mga nadulaan sang trabaho kasunod sang Modifiied Enhanced Community Quarantine (MECQ).
Ginpahayag man sini nga ang mga drivers nga wala maregister sa assosasyon ang mahimo man nga magkuha sang referral sa punong barangay agud mahatagan sang ayuda.
Samtang, ginkompirmar man sang secretary general sang Sentrong Samahan ng mga Tsuper at Operator sa Negros (SSTONE) nga may 50 na ka mga driver sa Barangay Pahanocoy nga nahatagan sang ayuda nga ginpangunahan sang DSSD kag barangay officials.
Suno kay Jessie Ortega, masobra 2,000 ang miyembro sang ila organization.
Nagalaom ini nga mahatagan sang ayudad ang tanan nga driver sa nasari-sari nga barangay.
