Tubtob sa alas-6:30 sang aga nalang bwas, oras sa United Kingdom ang pagpatigayon sang public viewing kay Her Majesty Queen Elizabeth II.
Ini ang mangin umpisa naman sang seremonya para sa state funeral sang reyna.
Suno kay Bombo International Correspondent Delia Llorca, derekta sa United Kingdom, magadangat sa 14 oras ang pagpila tubtob sa makatamwa sa lungon sang longest-reigning monarch.
Bangod sini, ang iban nga wala mahimo makahatag sang pagtahod pinaagi sa public viewing ang nagplastar na sa mga alagyan nga pagalabayan sang state funeral.
Apisar nga gindeklarar nga bank holidays sa Britanya, sila nga mga healthworkers ang nagapadayun gihapon sa pagserbisyo gani sila ang magagamit nalang sang projector kag widescreen agud nga sila ang makalantaw sa seremonya kalakip na ang ila mga kliyente kag bisita.
Iban sa mga pumuluyo ang ginpakita naman ang pagpakig-unong sa paghalad sang bulak sa Buckingham palace.
Paathag ni Llorca nga tuman ka bilidhon sa mga pumuluyo ang nasambit nga adlaw ilabi na nga 70 ka tuig nga nagpamuno sa England si Queen Elizabeth II.
Paathag sini nga ang pagpila sang malawig nga inoras para makatamwa lang sa reyna ang pagpakita sang mga pumuluyo sang pagpalangga sa monarch kag pagsuporta sa royal family.
Nagapati naman si Llorca nga preparado na ang royal army ilabi na nga madamo sang mga delegates gikan sa nagkalainlain nga pungsod nga ginalauman magatambong sa lubong.
Aminado naman ini nga may mga magagmay nga reports sang mga kinigamo apang indi man makahatag pagpanghangkat sa pumuluyo.
Madamo naman sang mga pinuno gikan sa nagkalainlain nga pungsod nga yara na sa karun sa London.
Nakita man sang mga ini nga ginpaiway sang mag-utod nga Prince William kag Prince Harry, bata ni King Charles III ang ila kinaiya bilang paghatag sang pagtahod sa reyna kun sa diin sila ang makita nga nakasuksok sang parehas nga uniporme samtang yara sa likod sang lungon sang ila lola.
Aminado si Llorca nga may iban nga pumuluyo sa United Kingdom nga indi komporme sa pagpasa sang trono kay King Charles III apang, sa masami nagahatag gihapon ang mga ini sang pagtahod sa Hari nga nagakalisod kasunod sang kamatayon sang iya iloy.
Sa personal nga aspeto, dako man ang pagtahod ni Llorca kay Queen Elizabeth kag nakita ang pagpalangga sini sa England.
