Gindala na sa Bureau of Immigration (BI) sa Manila ang pugante nga Indian national nga nadakpan sa Barangay Taculing, Bacolod City sang Lunes sang gab-i.
Naaresto si Joginder Geong kag nagagamit man sang pangalan nga Kant Gupta.
![](https://img.bomboradyo.com/bacolod/2024/07/INDIAN-NATIONAL-DAKOP-SA-BACOLOD.jpg)
Si Geong ukon si Gupta ang nagapangatubang sang kaso nga paglapas sang Philippine Immigration Law, Commonwealth Act No. 613, kag ginakabig ini nga undesirable alien bangu nga isa ini ka pugante nagikan sa India.
Ang nasambit nga persona ang nagapatubang sang madamo nga kaso sa India nga ginalakipan sang murder, attempted murder, extortion kag robbery kag ini man ang lider sang organized crime syndicate kag ini ang may sentensya nga life imprisonment bangud sa paglapas sang layi sa nasambit nga pungsod.
Nahibaluan man nga miyembro ini sang Khalistan terrorist group sa India.
Si Geong ang nagapanago sa Pilipinas gamit ang peke nga ngalan nga Kant Gupta kag fraudulent Nepalese Passport.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 6, humalin pa sang tuig 2022 nga nagatinir sa ciudad sang Bacolod si Geong kun sa diin nakapatukod na ini sang iya negosyo.
Suno diri, ila nabaton ang impormasyon nga may nagapanago nga wanted nga foreign national sa ciudad.
Sa bulig sang FILD kag CIT Bacolod sang RIU6, Bacolod Marpsta, RMU 6, 605th COY sang RMFB 6 kag FSU sang Bureau of Immigration, nahimo nga maaresto ang Indian national.