Ginpahayag sang commander sang 79th Infantry Battalion nga si Alejandro “Kier” Montoya ang nagapanguna sa mga operasyon sa pagpatay sa Northern Negros.
Sa interview sang Bombo Radyo Bacolod kay Lt Col. Eric Alfonso, matapos nga mapatay ang mga political leader kag commanding officer ang nakita sa karun sang Philippine Army nga ang mga nabilin na lamang nga miyembro sang rebelde nga grupo ang nagapatigayon sang mga operasyon sang pagpamatay sa Northern Negros.
Suno kay Alfonso, ang nagapanguna sa special operations amo ang pugante nga si Alejandro “Kier” Montoya.
Si Montoya sa karun ang ginabantayan sang mga militar kag ang katuyuan sang mga ini nga ma-neutralize ukon mas maayo nga magsungka na ang mga ini sa otoridad.
Samtang nalubong na ang miyembro sang Citizen Armed Force Geographical Unit (CAFGU) nga napatay sa engkwentro nga nagluntad sa tunga sang 79th Infantry Battalion kag rebelde nga grupo sa Barangay Malasibog, Escalante City, Martes sang hapon, Setyembre 29.
Ang CAFGU ang ginkilala kay Chris Jan Pahayahay.
Ginhatagan sang military honors sang 79th Infantry “Masaligan” Battalion si Pahayahay kadungan sang paglubong diri bilang pagkilala sa iya nga serbisyo, dedikasyon kag sakripisyo para sa pungsod.
Nagtambong diri ang pamilya, mga abyan kag mga kaupdanan sa serbisyo sang nagtaliwan.
