Ginpakigbahin sang hepe sang Victorias City Police Station nga magasungka na kuntani sa otoridad si Danilo Celeste, isa sa mga pugante gikan sa Negros Occidental District Jail, apang napatay ini sang magbato sang napalibutan na sang mga kapulisan sa Sitio Catabla, Barangay San Fernando, Talisay City sang Hulyo 2.
Suno kay P/Lt. Col. Eduardo Corpuz, matapos mapatay si Marvin Celeste sa Hacienda Veles, Barangay Blumentritt, Murcia sang Hunyo 30, gilayon man nga nagpadulong sa Victorias City Police Station ang utod nga babayi sang duha ka Celeste kag nagpahayag nga magabulig ang mga ini nga mapasungka ang utod sa baylo nga indi ini pagsakiton.
Apang antes pa man ini makasungka, naunahan na ini nga maluthangan sang matukiban ang ginapanaguan nga hayob-hayob kag una ini nga nagpalupok sa mga otoridad.
Pahayag ni Corpuz, gintawagan na ini sang iya nga himata kun sa diin ginpanugyan nga sa tion nga makaabot ini sa ila, gilayon man ini nga magasungka.
Nagpasalig naman ang Victorias City Police Station nga indi pagsakiton ang pugante kun hilway nga magasurrender.
Kasunod sang pagkapatay kay Danilo Celeste, wala naman nila nakasugilanon ang pamilya sang mga ini kag natukiban nga naghalin na sa ila nga puluy-an.
Ginalantaw sang hepe nga nahadlok ang mga ini gani nagpanaog sa syudad apang nagapati naman ini nga batun na sang pamilya ang natabo sa mag-utod nga pugante.
