Nadugangan pa ang numero sang mga person’s under investigation (PUIs) may angot sa 2019 novel coronavirus acute respiratory disease (NCOV-ARD) sa ciudad sang Bacolod.
Sini lang nga udto sang ginkumpirmar ni Dr. Grace Tan, head sang Environment and Sanitation Division sang City Health Office (CHO) kag spokesperson sang Inter-Agency Task Force Against NCOV-ARD nga may duha pa ka nagdugang sa mga PUIs karun sa ciudad kag ini ang ginalakipan sang isa naman ka foreign national kag isa ka lalaki nga Pinoy.
Apang suno kay Dr. Tan, indi na nila pagpahibalo kun sa diin nga mga hospital ang mga ini gina-obserbaran sa karun.
Nagdugang ang duha sa 12-anyos nga lalaki nga may travel history sa Hong Kong kag Macau kag isa ka 58-anyos nga Pinay.
Nahibaluan nga ang Canadian national nga gindala sa rekord sang Bacolod kag gin-admit sa Corazon Locsin Montelibano Memorial Regional Hospital ang nag-negatibo na sa coronavirus virus santo sa kumpirmasyon sang Research Institute for Tropical Medicine (RITM).
