Ginpahayag sang jeepney driver nga nagabiyahe sang Mandalagan-Libertad nga nabuhinan ang ila nga pagtiyog sa ila routa kadungan sang pagbukas sang klase bangud sa magutok nga traffic.
Sa interview sang Bombo Radyo Bacolod kay Desiderio Enisimo, ang anum nga routa ang nangin lima nalang bangud sa traffic kadungan sang klase kag nadugangan pa sang ginpangbungkal nga mga dalan nga wala gilayon natapos.
Panawagan sini nga kuntani mahimuan sang syudad sang paagi nga mahagan-hagan ang traffic sa syudad.
Samtang suno naman kay Joshua Barros, maayo kuntani magbiyahe ilabi na nga madamo sang pasahero apang amo man gihapon ang ila kita bangud bisan ano pa kadamo sang pasahero kun maipit ka sang trapiko wala ka gihapon sang kuhaon nga pasahero.
Suno kay Barros, sadto nagabiyahe siya sang tricycle apang nagsaylo siya sa depasahe bangud luyag man sini nga maeksperyensyahan ang pagbiyahe sa jeep.
Suno diri daw mabalik nalang ini biyahe sang tricycle bangud makapoy ang depasahe bangud tanan nga bahin sang lawas ang nagahulag kag tuman pa ka laba ang traffic.
Nagalaom man ini nga mas maayo nga magnubo lang anay ang diesel bangud wala pa sila nakabawi apisar nga nagnubo na ini sang nakaligad nga semana.
Nagapangabay man ini nga mahimuan man sang syudad sang paagi nga mapahagan-hagan ang traffic sa syudad.
