Nagpangayo sang pasensya ang pinuno sang committee on transportation sa Sangguniang Panlungsod sang Bacolod sa mga taxi drivers nga nawad-an sang pangabuhian kadungan sang pagpaidalum sang Bacolod City sa modified enhanced community quarantine (MECQ).
Sa interview sang Bombo Radyo kay Councilor Dindo Ramos, nagpangayo ini sang pasensya sa mga taxi drivers bangud wala sang kapasidad ang local government unit nga magpabyahe ukon magpapick-up sang pasahero sa mga ini bangud napaidalum ang ciudad sa MECQ.
Suno kay Ramos, indi man sila sarang nga mahire sang gobyerno bilang service sa mga frontliners kag essential workers bangud lain ang rate sini sang sa public utility jeepneys kag mas convenient kun mga jeep ang gin-arkilahan.
Suno sa iya, naghingyo ini kay Mayor Evelio “Bing” Leonardia nga mabuligan ang mga taxi drivers bangud sila gid ang naapektuhan sa pagsaka sang quarantine status sa ciudad.
Nagpasalig ini nga nakahibalo gid siya sang ila mga sentimyento apang bilang isa ka konsehal suno sa iya, ang pagpasa sang resolusyon lang gid ang ila mahimo agud makahatag man sang ayuda sa mga nawad-an sang palangabuhian.
Samtang, ginkumpirmar man sini nga nadugangan ang mga jeepneys nga nagabyahe sa idalum sang Libre Sakay Program sang Bacolod City government.
Suno kay Ramos, may yara na sa karun sang siyam ka mga PUJs nga nagabyahe sa tagsa-tagsa ka mga terminal ukon ruta.
Bangud nga may pito ka ruta nga gintalana sa ciudad, 63 na tanan ka mga PUJs ang nagabyahe agud magdul-ong kag magsugat sa mga medical kag essential workers.
