Dakop ang isa ka pulis sa ginpatigayon nga gun buybust operation sang Criminal Investigation and Detection Group Regional Field Unit -Negros Island Region (CIDG RFU-NIR) sa banwa sang La Castellana kahapon.
Ang suspetsado ang ginkilala kay Alyas Genesis, 31 anyos, residente sang Juan Luna St., Brgy. Robles, La Castellana, police patrolman nga assigned sa City Mobile Force Company sang Cebu City Police Office.
Kaupod man sini nga nadakpan si Alyas Niño, 31 anyos kag residente man sa lugar.
Pinaagi sa tracker team sang La Castellana Municipal Police Station natigayon nga madakpan si Genesis kag narecover ang pila ka mga ebidensya nga ginalakipan sang isa ka unit sang KG-9 Sub-machine Pistol nga wala sang serial number, isa ka magazine, isa ka unit cal 9mm GERSAN pistol, isa ka magazine nga may unod nga lima ka live ammunitions nga PNP issued firearms, napulo ka 9mm live ammunitions, isa ka black holster, isa ka unit sang silver nga toyota vios, P22,900 nga boodle money kag P100 nga buy-bust money.
Ang suspect nga pulis ang pagapasakaan sang mga kaso sa paglapas sang RA 10591 ukon Comprehensive Firearms and Ammunition Regulation Act kag kaso administratibo.
