Nagapadayon pa ang imbestigasyon sang Isabela Municipal Police Station agud nga mahibaluan kun may foul play sa kamatayon sang isa ka police nga nasapwan nga patay na sa iya nga balay banwa sang Isabela kahapon sang aga.
Sa interview sang Bombo Radyo Bacolod kay Police Captain Judesses Catalogo, spokesperson sang Negros Occidental Police Provincial Office (NOCPPO), nakabaton sila sang impormasyon nga may yara sang insidente nga imbulbado ang isa sa personnel sang Isabela Municipal Police Station.
Suno kay Catalogo, sang mabaton ang impormasyon nagpadala ang provincial director sang Negros Occidental Police Provincial Office sang imbestigador gikan sa provincial investigation and detective management unit agud nga magpatigayon sang parallel investigation kaupod ang imbestigador sang Isabela Municipal Police Station.
Ginpahayag sini nga sa karun ginahibalo pa kag ginaimbestigaran ang mga rason nga nangin tunaan sa pagluntad sa insidente.
Antes ang insidente, nagtambong pa ang biktima sa meeting kahapon sang aga kag wala man sang indikasyon nga may yara sang ginatago nga problema ang biktima bangud nagakadlaw man ini.
Matapos ang meeting nagpauli man ini sa ila nga puluy-an.
Kaupod sang biktima sa balay ang utod sini apang may ginbakal ini kag pagbalik nakita sini nga wala na sang kabuhi ang biktima.
Suno kay Catalogo, narecover man kun sa diin ini nasapwan ang issued service firearms sang biktima.
Ang biktima ang yara na sa funeral parlor kag ginpatigayunan na sang katapo sang Scene of the Crime Operation kasubong man sang post mortem examination.
Samtang ang issued service firearms naman sang police nga ginasuspetsuhan nga gingamit sa insidente ang ginsubmit man sa SOCO para sa power nitrate testing agud mahibaluan kun ang armas ang gingamit sa insidente.
Wala man sang karelasyon ang biktima.
Sa karun nagapadayon pa ang imbestigasyon sang imbestigador sang NOCPPO kag Isabela Municipal Police Station sa insidente.
Hungod nga wala ginhingadlan ang biktima bangud nagapadayon pa ang imbestigasyo kag privacy man sang pamilya.
