Pulis nga assigned sa City Drug Enforcement Unit sang BCPO, ginpatay samtang nagasakay sa motorsiklo sa Barangay 38 kahapon

Patay ang isa ka pulis matapos nga ginluthang sang mga suspetsado nga nagasakay sa motorsiklo sa Rosario Street, Barangay 38, Bacolod City kahapon sang hapon.

Ginhingagaw pa dala sa ospital ang biktima nga si Police Staff Sergeant Joseph Nepomuceno apang gindeklarar ini nga dead on arrival pasado alas-5:00 sang hapon.

Ang 37 anyos nga si Nepomuceno ang miyembro sang Bacolod City Police Office-City Drug Enforcement Unit (BCPO-CDEU).

Suno kay Police Major Ramel Sarona, Station Commander sang Bacolod Police Station 1, nakaangkon sang apat ka igo ukon pilas ang biktima sa nagkalain-lain nga bahin sang iya lawas.

Sa subong, padayon pa ang imbestigasyon sang mga kapulisan kun sin-o ang suspetsado kag kun ano ang motibo sa pagpatay sa biktima.