Ginatumod pa kun accidental firing ang pagkatiro sa isa ka pulis nga nadestino sa Sagay City Police Station nga nagresulta sa iya nga kamatayon sa Corner Arellano Cabahug St., Barangay Zone 4, Cadiz City kagab-i.
Sa interview sang Bombo Radyo Bacolod kay P/Lt. Col. Robert Mansueto, hepe sang Cadiz City Police Station, ginpahayag sini nga mga alas-9:15 kagab-i sang natabo ang insidente.
Halin sa ilimnan kag padulong na sa salakyan agud magpauli ang biktima nga si P/Staff Sgt. Bernie Sales upod ang duha niya ka lalaki nga abyan kag utod sang iya nobya nga si Beverly Latosa, 25 anyos.
Suno kay Mansueto, gina-alegar nga may ginlalisan sanday Sales kag Latosa kun sa diin ginapahayag nga naggabot sang pusil ang pulis agud kuntani nga sayluhon apang hinali nalang ini nga hakos ni Latosa sa pagdumdom nga itaya sang biktima ang 9mm pistol sa iya.
Apang, aksidente nga naglupok ang armas nga gina-uyatan ni Sales kag naigo ini.
Nakaangkon sang pilas sa nawala nga bahin sang dughan ang biktima nga naglapos sa natuo sini nga balikawang.
Ginhingagaw pa dala sa ospital ang biktima apang ginbawian ini sang kabuhi mga alas-11:10 kagab-i.
Sa karon suno kay Mansueto, padayon pa ang ila imbestigasyon sa insidente kag ila pa lantawon ang CCTV footage sa lugar agud ma-establish ang natabo.
