Ginkompirmar sang hepe sang Talisay City Police Station nga may yara sila sang isa ka police nga nagpositibo sa COVID-19.
Sa exclusive interview sang Bombo Radyo kay Police Major Jigger Gimeno, ginpahayag sini nga sadtong Agosto 29 naka-eksperyensya sang malain nga pamatyag ang isa ka police sergeant nga nadestino sa Talisay City Public Market sa diin gilayon ini nga nag-pahuway kag wala na nag-render sang iya nga duty.
Agosto 31 sang gab-i sang nagpadulong sa Teresita Lopez Jalandoni Provincial Hospital ang police agud magpacheck-up kag gilayon ini nga ginpaidalom sa swab test.
Matapos ang duha ka adlaw, naggwa ang resulta sini nga positibo sya sa virus kag gindala sa Cadiz Healing Center.
Dugang pa ni Gimeno, wala sila naka-close contact sa amo nga police bangud wala ini nagakadto sa bag-o nila nga police station nga nahamtang sa sulod compound sang New Talisay City Hall sa Barangay Zone 12-A.
Kadungan man sang mass testing nga gin-patigayon sa Talisay City sadtong Agosto 30, nag-paidalum man ang 30 ka mga police personnel sang Talisay lakip na si Gimeno kag nag-quarantine bilang kabahin man sang health protocol.
Sa karun, suno sa hepe, yara pa sa gihapon sa Healing Center sa syudad sang Cadiz ang police sergeant nga yara naman sa karun sa maayo nga kahimtangan.
