Gin-relieve na ang patrolman nga nangtaya pusil kag nang-kastigo sa 6 ka mga persona sa banwa sang Ilog sadtong Biernes Santo.
Sa interview sang Bombo Radyo Bacolod sa hepe sang Ilog Municipal Police Station nga si Police Major Norberto Barniso, ginpahayag sini nga natabo ang insidente sa Barangay Dancalan sa banwa sang Ilog, las-11:10 sang gab-i sadtong Abril 19, Biernes Santo.
Ginkilala ang suspetsado kay Patrolman Jan Reymel Bagatela, 34 anyos kag naka-assigned sa City Mobile Force Company kag City Drug Enforcement Unit kag gin-reassigned sa Regional Personnel Accounting and Holding Unit (RPHAU) – 6 sa syudad sang Iloilo epektibo sadtong Abril 22.
Suno kay Barniso, yara sa makahulubog nga ilimnon si Bagatela sang iya gin-tawag ang isa sa mga biktima nga nagasakay sa motor agud tsekyaron ang mga dokumento tuhoy sa pagpanag-iya sang motorsiklo.
Apang wala sang may napakita nga mga dokumento ang biktima nga si Ritchie Gerasmia, 22 anyos, isa ka call center agent, iya ini gin-sipa kag gin-sumbag kag gin-suspetsohan nga miyembro sang New People’s Army (NPA).
Samtang, nakit-an naman sang 6 ka mga biktima ang ginhimo ni Bagatela nga pag-pangkastigo kay Gerasmia, ila ini gin-palapitan sa diin pila sa ila ang ginsumbag man ni Bagatela kag gin-tayaan sang pusil.
Ginkilala naman ang 6 ka mga biktima nga sanday
Justine Karl Gecosala, 18 anyos; John Carlo Yap, 18 anyos; Jake Amen, 22 anyos kag lunsay residente sang Barangay Dancalan, kag duha pa ka mga menor de edad.
Dugang pa ni Barniso, may yara na sang kaso si Bagatela kaangay sini sadtong nakaligad nga tuig bangud kun siya ang mahubog nagalain ang iya pamatasan.
Ginpahayag man sang hepe nga malinong nga tawo si Bagatela kun wala naka-inum.
Naga-pangatubang na karun sang kaso nga multiple physical injuries, threat, kag physical injuries may angot sa violation of Republic Act 7610 ukon ang “Special Protection of Children against Abuse, Exploitation and Discrimination Act.
