Ginbisitahan ni Police Regional Office 6 Director Police Brigadier General Jack L Wanky kag gin-awardan sang
“Medalya ng Sugatang Magiting” si PSSg Ronnie Urbano Melgar bangud sa ginpakita nga dedikasyon sa ginsumpaan nga obligasyon.
Nasamaran si Melgar matapos nga natirohan sa banwa sang Toboso samtang nagapatigayon sang drug buy bust operation.
Sa interview sang Bombo Radyo Bacolod kay Police Major Jun Ray Batadlan, hepe sang Toboso Municipal Police Station, nagpatigayon sang drug buy bust operation ang Toboso Municipal Police Station sa Sitio Felisa, Brgy. Magticol, sa nasambit nga banwa, alas- 2:30 kaina sang kaagahon, Hunyo 8.
Ginkilala ang mga subject persons sa buy bust operation nga sanday Joery Dela Cruz alyas ‘Yao Ming’ ukon ‘Kempee’, 45-anyos, residente sang Sitio Camp Proper, Barangay Minapasok, banwa sang Calatrava kag Aries Azucena, 30-anyos, residente sang Brgy. Bug-ang banwa sang Toboso, Negros Occidental.
Suno kay Batadlan si Dela Cruz ang ginakabig nga top 1 drug personality sa station level samtang si Azucena naman ang ginakabig nga top 5.
Nakumpiskar sa duha ang masobra sa 61 ka gramo sang suspected shabu nga nagabalor sang kapin sa P417,588, kag isa ka calibre 45, duha ka magazine nga may 12 ka bala kag duha ka motorsiklo.
Samtang, nagapatigayon sang operation hinali lang nga may nagtiro kay Police Staff Sergeant Roni Melgar, 40-anyos, residente sang Brgy Vito, ciudad sang Sagay, imbestigador sang Station Drug Enforcement Team.
Ang suspek nga nagtiro ang ginkilala nga si Albert Alico alyas “Nonoy Gahe”, 32 anyos, residente sang Sitio Camp Proper, Barangay Minapasok, banwa sang Calatrava, nga amo ang nagahatag sang security sa duha ka subject person kag ini ang nagapanago kapin sa 20 metros gikan sa area sang buy bust operation.
Nag-angkon sang igo sang pagpangluthang si Melgar sa butkon sini.
Gilayon nga gindala si Melgar sa ospital para hatagan sang nagakaigo nga pagbulong kag mismo si Police Regional Office 6 Director Police Gen. Jack Wanky ang nagbisita kag naghatag sang medalya sang sugatang magiting sa napilasan nga police.
