Nagpatigayon sang moment of silence ang Bacolod City Police Office kadungan sang ila flag-raising ceremony kaina sang aga para sa isa ka pulis nga napatay sa aksidente sang papauli na nagikan sa augmentation sa security sa natapos nga MassKara Festival 2023.
Ang biktima ang ginkilala nga si Patrolman Reden Agus, 31 anyos, tumandok sang Kabankalan City, Negros Occidental kag na-assign sa Iloilo Police Provincial Office.
Kapin alas 2:00 kaina sang kaagahon, papauli na si Patrolman Agus sa Kabankalan sang nakabunggo ang ginamaneho sini nga motorsiklo nga Mitsubishi Canter sa Purok Ipil-Ipil, Barangay San Juan, Pontevedra.
Sa interview sang Bombo Radyo kay Police Major Romulo Gepilango, hepe sang Pontevedra Municipal Police Station, sugata ni Agus ang Canter sang hinali lang nagliko ang motosiklo sini sa lane sang truck nga nagresulta sang collision.
May suksok nga helmet si Agus apang bangod sa makusog nga pagbungguanay, nag-agom ini sang pilas sa ulo nga gintunaan sang iya kamatayon.
Suno kay Gepilango, posible nga natuyo ang pulis kag natulugan gani madasig ang pagpadalagan sini sang motorsiklo kag nakabunggo sa truck nga ginamaneho ni Sony Elet.
Sa interveiw sang Bombo Radyo kay Police Col. Noel Alino, city director sang Bacolod City Police Office, ginakasubo sang BCPO ang natabo sa ila nga kaupod sa serbisyo nga kapoy man sa duty antes maaksidente.
Suno diri, magahatag sang bulig ang BCPO sa pamilya ni Agus.
Nahibaluan nga masobra sa isa ka libo nga mga police officers ang gin-augment sang Police Regional Office 6 sa ciudad sang Bacolod para sa security sang MassKara Festival humalin sang Oktubre 6 tubtob kahapon, Oktubre 22.
