Nagpadulong pa sa balay ni Kristine Joy Dignadice ang pulis nga nagpakilala nga nobyo sini nga amo man ang suspek sa pagpatay sa iya.
Kahapon nagsungka ang suspect nga ginkilala nga si Police Staff Sgt. Enrique Gonzalodo, nga mobile patroller sang Bacolod Police Staton 5 kun sa diin gin-ako sini nga siya ang nagpatay kay Dignadice kag ginsugid sini mismo kun diin niya ginhaboy ang bangkay.
Madumduman nga sang Oktubre 29 may nasapwan nga salakyan nga may mga dugo nga gin-abandonar sa Sitio So-ol, Brgy. Gargato, Hinigaran kag nakilal-an nga ang tag-iya amo si Dignadice, 43 anyos, single mother kag residente sang Victorias City.
Gin-ako ni Gonzalodo nga natabo ang krimen sa Bacolod-Talisay intersecion sang Bacolod-Silay Airport Access Road kag iya man gintudlo kun diin sini ginhaboy ang bangkay ni Dignadice sa Central Ma-ao, Brgy Don Jorge Araneta sa Bago City.
Sa interview sang Bombo Radyo kay Alyas Jay, hinablos ni Dignadice, sang Oktubre 30, alas- 8:00 sang aga, nag-abot si Gonzalodo sa ila balay kag nagpakilala nga nobyo siya sang iya tiya.
Ginpasulod nila si Gonzalodo kag nakilal-an nga isa ini ka pulis.
Suno diri, ginsugid sa ila ni Gonzalodo nga nagpadulong si Dignadice sa iya sa Brgy Granada, sang Oktubre 29, alas- 5:00 sang kaagahon agud kuntani magpa-upod sa iya padulong sa buyer sang iya salakyan.
Apang siya ginpamalibaran ni Gonzalodo bangod natuyo ini halin sa iya duty.
Suno pa sa pulis, amo yadto ang ulihi nila nga kit-anay nga duha.
Suno kay Alyas Jay, halos indi ini makapati sa natabo sa iya tiya nga may 10 anyos nga bata.
