Ginhatagan lang anay sang station commander sang Bacolod Police Station 5 sang temporaryo nga trabaho ang police nga naassign sa Station Drug Enforcement Team sang nasambit nga police station samtang nagapadayon ang imbestigasyon matapos nga nakabutang ang pangalan sini sa papel kag apid sa utod nga natuo nga kamot nga ginbilin sa Purok Riverside, Barangay Bata, Bacolod City sang Lunes sang aga.
Sa interview sang Bombo Radyo Bacolod kay Police Captain Francis Depasucat, nakareport na si Police Staff Sergeant Anthony Vistar kag ini ang ginrelieve sa iya designation sa SDET kag ginhatagan lamang sang iban nga trabaho.
Suno kay Depasucat, ginpahangop man sini kay Vistar nga wala siya ginrelieve bangud guilty siya kundi bangud nga nagapadayon pa ang imbestigasyon.
Ginpahayag man sini nga hugot nga ginpanginwala sang police personnel nga wala ini sang kaangtanan bisan ano nga iligal nga aktibidad.
Sa personal man sini nga pag-assess wala man ini nagapati nga imbulbado ang personnel sini sa nasambit nga alegasyon.
Suno kay Depasucat si Vistar ang isa ka mabuot kag mapisan nga operatiba.
Suno diri, personnel sang station 5 ang nasambit nga police humalin sang 2018 tubtob sa karun.
Nagpasalig man ini nga hatagan sini sang seguridad ang tanan sini nga personnel kalakip na si Vistar bangud ini ang iya nga mga nasakupan.
Nakahanda man ini nga maghatag sang report kag magtuman sang mando nga may kaangtanan sa nasapwan nga utod nga kamot sa Barangay Bata.
