Magapasaka na sang kaso ang pamilya sang duha ka menor de edad nga ginkastigo ni Police Staff Sgt. Harry Gonzaga sa Barangay 30, ciudad sang Bacolod sang Hulyo 10.
Suno kay Police Capt. Dax Santillan, station commander sang Bacolod Police Station 6, nagdesisyon ang guardian sang duha ka kabataan nga indi na pagpadayunon ang hearing sang Lupong Tagapamayapa sang Barangay 30 kundi magadiretso na sila sa pagfile sang kaso batok kay Gonzaga.
Nahibaluan nga santo sa rules, may tatlo ka hearing nga ginapatigayon sang Lupon antes maka-issue sang Certificate to File Action.
Suno kay Santillan, respetuhon nila ang desisyon sang pamilya bangud wala sila sang ginaapinan bisan kaangay nila nga pulis ang respondent.
Sa idalom sang layi, indi na dapat maglabay sa Lupon ang insidente bangud empleyado sang gobyerno ang involved, apang ginrespeto nila ang desisyon ni Punong Barangay Jan Mark Petierre nga ini ang isettle sa barangay.
Apang bangud nagdesisyon ang pamilya nga magpasaka na sang kaso, magapahibalo nalang sila sa Lupon angot sa desisyon sang pamilya.
Suno kay Santillan, ang kaso ang ipasaka sa Lunes sang aga bangud kaina, nagsumiter na ang pamilya sang medical certificate kag sila ang ginpasumiter sang Certificate of Live Birth sang kabataan.
Santo sa medical certificate, may injury ang duha ka kabataan apang bangud kabahin ini sang ebidensya, nagbalibad si Santillan nga maghatag sang dugang nga detalye.
