Ginalantaw sang tindera sa tyangge sa Barangay Canjusa, sa banwa sang Pulupandan nga ginplano sang grupo sang isa sa mga biktima ang paghangkat sa pulis nga nagresulta sa pagtiro sini sa mag-amay kahapon, adlaw sang Paskwa.
Patay gid si Joman Fuentes, 21 anyos, single, construction worker samtang pilason naman ang amay sini nga si Jomarie Fuentes, 52 anyos, kasado, construction worker kag ang suspect amo si Police Corporal Armin Alanza, 36 anyos lunsay residente sa lugar.
Sa interview sang Bombo Radyo Bacolod kay Amy Pechardo, ala-1:00 sang kaagahon pa lamang naga-inom na sa ila nga tyangge ang pulis nga masami naga-inom sa ila kun day-off.
Hinali na lamang nagpalapit ang mga barkada ni Joman nga nagapahayag nga mamaryente sa pulis.
Suno kay Pechardo, kaangay nga may ginpahayag ang pulis nga “bakulon taka karun” nga nabatian sang isa sa grupo.
Una na nga may nagluntad nga komosyon apang naghusayay man kag naghakusanay pa ang mga ini antes magpuli.
Apang alas-4:00 sang kaagahon, magabayad na kuntani si Alanza, liwat nga nagbalik ang tatlo kaupod si Joman kag suno diri kaangay nga rasun nalang ang pagbakal kag ang tuyo gid amo ang pulis.
Ginhambalan sang mga ini si Alanza sang “Police ka bastos ka?”, kag didto na nag-umpisa ang komosyon samtang si Joman naman ang una nga nagpanapungol.
Nagpadayun ang pagsaputihay sang pulis batok sa tatlo tubtob nga sila ang magdangat sa arko kun sa diin nakabutang ang “Welcome to Barangay Canjusa”.
Sa nasambitan nga lugar, nagabantay ang madamo pa nga grupo sang tatlo.
Suno kay Pechardo, makatilingala nga nakaplastar na ngadaan sa lugar ang iban nga grupo nanday Jomar, kag bangod sa kadamuon sang nagasapote sa iya, ginalantaw sang tindera nga napilitan ang pulis nga mangluthang.
Apang aminado man ini nga wala na nila makita ang pagluthanganay bangod ini ang natabo 50 metros na gikan sa tyangge kag sila ang naggwa na lamang sang gindala na sa ospital si Joman, ang amay sini nga si Jomarie kag ang pulis.
