Mahimo mangatubang sang criminal kag administrative cases ang pulis nga nangluthang sang mag-amay sa Barangay Canjusa, sa banwa sang Pulupandan.
Patay gid si Joman Fuentes, 21 anyos, single, construction worker samtang pilason naman si Jomarie Fuentes, 52 anyos, kasado, construction worker kag ang suspect amo si Police Corporal Armin Alanza, 36 anyos lunsay residente sa lugar.
Sa interview sang Bombo Radyo Bacolod kay Police Capt. Judesses Catalogo, spokesperson sang Negros Occidental Police Provincial Office, ginakasubo nila nga may isa ka police personnel nga involved sa shooting incident kadungan pa sa paskwa, Disyembre 25.
Paathag sini nga indi katapo sang NOCPPO si Alanza kag ini ang katapo sang 604th Company sang Regional Mobile Force Battalion 6.
Suno diri, sila ang magapatigayon sang parallel investigation sa kaso kag nagpasalig ini sa pamilya nga mangin patas ang ila imbestigasyon.
Kun mapamatud-an, ang pulis ang kasuhan kriminal sang Pulupandan Municipal Police Station, kag ini ang mangatubang man sang kaso administratibo ukon ipaidalom sa nagakadapat nga disciplinary mechanism sang Police Regional Office 6.
Magapatigayon man sang imbestigasyon kag rekomendasyon ang Internal Affairs Service sang Philippine National Police kag National Police Commission (NAPOLCOM).
Paathag ni Catalogo kun madasig maghatag sang pagkilala ang PRO 6 sa maayo nga performance sang mga kapulisan, sila ang seryoso man sa paghatag sang disiplina sa mga pulis nga naga-abuso.
