Mabuot kag mapinalanggaon ang police nga aksidente nga naluthangan sang pito ka tuig niya nga bata sa Purok Eba, Brgy Andres Bonifacio, Sagay City, Negros Occidental sang Abril 27, suno sa ila nga helper.
Sa interview sang Bombo Radyo Bacolod kay Kenny Bendoy, helper sa balay sang biktima, tupad balay lamang sila sang biktima nga si Police Staff Sergeant Lernie Alacha, 44 anyos apang nagakadto siya sa balay sini kun wala sang klase agud magbulig sang pagpanglimpyo kag ginahatagan man ini sang dugang nga pang-allowance.
Suno kay Bendoy, nag-umpisa ang tanan sang naglive na ang duha sa tiktok kag sa ulihi wala natalupangdan sang biktima nga may ginachat na nga lain ang kalive in sini.
Sang ulihi natukiban man sang police kag nag-umpisa na ang pagpangimon tubtob nga nagluntad na ang insidente.
Sang natabo ang insidente nakabati ini sang isa ka lupok samtang nagabantay ini sang agot nga bata sang biktima kag nahibaluan nalang sini nga wala na ang police sang nagpangayo na ang kalive in sini sang tabang nagikan sa ila tupad-balay.
Dugang pa sang helper nga antes mabawian sang kabuhi ang biktima nakahambal pa ini sa iya kalive-in nga halungan sini ang ila mga kabataan ilabi na ang agot nga bata apang wala na sini ginhinambit ang nakatiro diri nga bata.
Ang biktima man mismo ang naghambal nga ang bata niya ang nakatiro sa iya antes pa man madulaan sang ginhawa.
Ginpahayag man nga ang bata ang natrauma na sa adlaw-adlaw nga nagakatabo nga inaway sa tunga sang maglive-in.
